Est connòschidu cun su nùmene Padre Luca. Est nàschidu in Patada in su 1748 e est mortu in Aristanis in su 1828. Dae piticu est istadu in Tàtari istudiande e giai de cussos tempos fuit mentovadu intra sos cumpanzos de iscola pro sa capacidade poetica. S´est fatu padre iscoloppio e at traballadu in s´iscola po una pariga de annos. De repente, si ch´est essidu de s´ordine religiosu e si ch´est torradu a bidda sua. Inie s´est postu a bìvere in su sartu cantende a sos massaios sos versos suos.
A betzu at chèrfidu intrare torra in s´ordine dedichèndesi a sas òperas de caridade, a sa predicatzione, a s´imparu.
In Sardinna est istadu su primu poeta de s´Arcadia, chi, morta dae ora in sos àteros logos, in Sardinna at bìviu fintzas a s´Otighentos e fortzis fintzas a dies de oe.