Giulio Angioni est nàschidu in su 1939 in Guasila,Trexenta. At istudiadu antropologia culturale tenende a modellu istudiosos che a Alberto Maria Cirese e Ernesto di Martino. At aprofundadu sos istùdios in s´estero, traballende comente insegnante puru. A pustis de àere fatu esperièntzias de importu in Gran Bretagna, Frància e Germània, in su 1981 at pigadu sa càtedra de Antropologia Culturale in s´Universidade de Casteddu inue galu traballat. Est cussideradu un´esponente de ispicu de s´antropologia italiana, e est puru unu de sos iscritores sardos prus mentovados e istimados, comente si cumprendet dae sos prèmios chi at bintu cun sas òperas suas: Alba dei giorni bui in su 2005 at otènnidu su Prèmiu Dessì, Le fiamme di Toledo s´annu a pustis at bintu su Prèmiu Mondello e su Prèmiu Corrado Alvaro.