Incisore de sos prus mannos de su noighentos, pintore e istudiosu de arte.
Est nàschidu in Tàtari in su 1897 e at istudiadu arte èssende autodidata.
At cumintzadu faghende caricaturas, cartolinas, ex libris. Appassionadu de xilografia, at cumintzadu in sos annos 1918-1919 a traballare in su ´Giornalino della Domenica´ e ´Rivista sarda´.
In sos annos dae su 1920 fintzas a su 1925 at istudiadu leze (si est laureadu in su 1921), est istadu pintore déco de rivistas, libbros e pubblicista puru.
In sos annos dae su 1926 fintzas a su 1927 at incumintzadu a faghere su professore in su liceo iscientìficu de Iglesias e s´at leadu sa maturidade artìstica in Firenze. In su liceo de Iglesias at formadu un´iscola de arte decorativa chi in sos annos Trinta at frutadu una leva de xilografos chi si podet nàrrere chi est istada un´iscola regionale.
In su 1927-1929 at partecipadu a espositziones de importu: sa II Esposizione Internazionale dell´Incisione Moderna de Firenze, sa Mostra Internazionale del Libro de Lipsia, sa I Biennale d´Arte Sarda de Tàtari, sa Mostra della Primavera de Casteddu. At pintadu in su 1927 s´òpera de Saba Montecassino e sa Sardegna medievale. In sos annos Trinta at partecipadu a biennales, mustras sindacales sardas, espositziones de xilografia de Varsavia e Bruxelles. In su 1934 una xilografia sua dedicada a sa Prima Gherra Mundiale est istada seberada in sos Cuncursos de sa Regina. "L´Eroica" at pubblicadu pintos suos medas e a issu at dedicadu duas essidas monogràficas in su 1932 e in su 1938.
In su 1936 Remo Branca si est laureadu in lìteras.
A pustis de sa segunda gherra mundiale si est apentadu cun sa cinematografia didattica, fundende in Roma sa rivista ´A passo ridotto´.
Suos sunt, dae sos annos Trinta a sos annos Settanta, istùdios medas a suba de s´arte in Sardigna e a suba de sa xilografia (La xilografia in Sardegna, Breviario di xilografia, Maestri incisori di Sardegna). At dedicadu a sos pitores, incisores e iscultores sardos de sa prima metade de su sèculu, sa rivista ´Frontiera´ (1968-1976).
Est mortu in Roma in su 1988.