Àteros piessignos

S'òpera

Sas camineras de s´iscrittura criativa non sun mai tottu derettas che bértigas ozastrinas ne in paris che pianta de manu. A chie si ponet a iscrìere, calesisiat chi siat su dissignu ch´hat in ànimu, de ite sisiat o de chie sisiat chi faeddet, da-i sa gianna de sos ammentos, chèrrere o non chèrrere, si l´acceran porradas marinas de sa vida sua. Tottu su chi nde birat da-i cussos ammentos che ruet in sa pàgina iscritta che sale sabidore. Cherzo narrere chi s´iscrittura est fiza de s´iscrittore. E duncas, finas faeddende de fattos nàschidos da-i sa fantasia sua, in su chi contat b´hat sempre parte de issu matessi: su chi fut, su ch´est, su chi diat cherer èssere. S´ànima de chie iscriet giughet ancas e ojos universales. Ma cussa universalidade brotat da-i su mundu ìntimu sou, da-i su ´trighinzu´ umanu inue est nàschidu e créschidu, inue hat sonniadu e peleadu. Sa mimoria ch´est intro s´ànima. Sa manu ch´iscriet nde l´isguttat a buttiu a buttiu, cun fadiga e finas cun dolore. E gasighì, su chi deo m´hapo propostu de contare in sas páginas chi sighin, benit da-i alluntanu, ma finas da-i accur-tzu. B´hat fittas de veridade istòrica, ma guasi tottu est inventadu. Però, cando si descrien sicustàntzias e fattos chi esistin in sai realidade e toccan sa carré ´ia de sa zente, finas su ch´est inventadu est beru cussu puru. Ca tottu su chi naschet da-i sa peràula creadora, bettat lughe in sas cosas reales pro las connòschere mezus.